वसतीगृह प्रवेशासाठी इयत्ता आठवी, अकरावीच्या विद्यार्थ्यांनी 5 ऑगस्ट 2022 पर्यत तर प्रथम वर्ष पदवी, पदविका, पदव्युत्तर, व्यवसायिक अभ्यासक्रमासाठी प्रवेश घेतलेल्या विद्यार्थ्यांकरीता 15 ऑगस्ट 2022 पर्यंत अर्ज सादर करावे. वसतीगृहातील रिक्त जागेनुसार व गुणवत्तानिहाय प्रवेश देण्यात येईल. वसतिगृह प्रवेशासाठी अर्ज करताना ऑनलाइन प्रणालीमध्ये अपलोड करण्यासाठी आवश्यक कागदपत्रे मागील वर्षी मिळालेले गुण, गुणपत्रिका, जात प्रमाणपत्र क्रमांकासहित, टीसी, चालू वर्षी प्रवेश घेतलेल्या शाळा, महाविद्यालयाचे बोनाफाइड, प्रवेश पावती, आधारकार्ड, दारिद्रय रेषेचे प्रमाणपत्र,उत्पन्न दाखला,पालक शासकीय सेवेत नसल्याचा दाखला,रहिवाशी दाखला,दिव्यांग प्रमाणपत्र, राष्ट्रीयकृत बँकेतील आधार संलग्न खात्याच्या पासबुकची झेरॉक्स, वैद्यकीय दाखला विद्यार्थ्यांनी सोबत बाळगावीत. अर्ज काळजीपुर्वक भरण्यात यावा. प्राप्त झालेला युझर आयडी व पासवर्ड कायम लक्षात ठेवावा. तसेच सन 2020-2021 या शैक्षणिक वर्षात प्रवेशित विद्यार्थ्यांनांही यंदाच्या शैक्षणिक वर्षासाठी अर्ज सादर करणे आवश्यक आहे.
प्रवेश प्रक्रीयेविषयक इतर माहितीसाठी नजीकच्या वसतिगृहातील गृहपाल यांच्याशी संपर्क साधावा. प्रवेशासाठी जास्तीत जास्त विद्यार्थ्यांनी https://swayam.Mahaonline.gov.in या संकेतस्थळावर अर्ज सादर करावे. असे आवाहन प्रकल्प अधिकारी तथा सहायक जिल्हाधिकारी मैनाक घोष यांनी केले आहे.